Ақтөбе облысында 2018 жыл Бала жылы деп жарияланған. Осыған орай облыс әкімдігі өскелең ұрпақты шығармашылық дамыту мақсатында бірқатар іс-шарадан тұратын арнайы «Бақытты бала» жобасын әзірледі.
Жоба «Рухани жаңғыру», «Туған жерге тағзым» мемлекеттік бағдарламалары аясында іске асырылып отыр. Конкурстың қорытынды кеші 1-2 маусым күндері өтеді.
«Бақытты бала-2018» конкурсында өрендер эстрадалық әндер шырқамақ, ал оған 10 жастан 15 жасқа дейінгі таланттар қатысады. Байқаудың шарты бойынша қазақ тіліндегі бір әнді (оның ішінде өзі жазып шығарғанын да) жеке орындағаннан кейін, дүниежүзілік хиттердің бірін таңдап, талантын дәлелдеуі тиіс. Конкурс бірнеше кезеңнен тұрады.
Фестивальге қатысу үшін өтініштерді қабылдау 2018 жылдың 15 мамырында аяқталды. Оған 420 жас ниет білдіріпті. Қашықтықтан іріктеу кезеңінде небәрі 20 бала ғана жолдама алған.
Салтанатты кешке әлемдік байқауларда жүлделі болған әншілер қатысады. Нақтырақ айтар болсақ:
- Димаш Құдайберген (Қазақстан) – дүние жүзіне әйгілі әнші
- Данэлья Төлешова (Қазақстан) – «Голос. Дiти» 2017 украиналық вокалдық конкурстың жеңімпазы
- Луиза Нұрқуатова – «Витебскідегі Славян базары» 2015 халықаралық фестивалінің бас жүлдегері
- Влад Сытник (Украина) – «Славян базары-2017» конкурсының жеңімпазы
- Джордан Аракелян (Армения) – армян әншісі
- Анастасия Дидух (Украина) – әуе гимнасты.
Байқаудың бас жүлдегеріне 2 000 000 теңге сыйақы берілмек. Ал негізгі жеңімпаздан бөлек 1-орын иегеріне 1 500 000 теңге, 2-орынға 750 000 теңге, ал 3-орынға 500 000 теңге көлемінде ақшалай сыйлық табысталады.
Бұдан бөлек қатысушылардың бірі әлемге әйгілі әнші, «Славян базары 2015», «Singer-2017» халықаралық конкурстарының жеңімпазы, «MTV Music Awards» сыйлығының иегері – Димаш Құдайбергеннің атаулы жүлдесімен марапатталады.
Ал қазылар алқасының құрамына халықаралық мәдениет және өнер қайраткерлері енді. Олар:
- Күлпаршын Айдарханова - Ақтөбе қаласы әкімінің орынбасары;
- Эмре Юселен – Түркияның әншісі және вокал оқытушысы. Вокалдық орындаушылар шолуларының авторы, әйгілі бейне блогер;
- Марат Әйтімов – Қазақстан Республикасының еңбек сіңірген қайраткері. Ақтөбе облыстық филармониясының солисі, А.Жұбанов атындағы Ақтөбе музыкалық колледжінің оқытушысы;
- Влад Сытник – Әртіс, оны Украинаның Алтын даусы деп атайды. Витебскідегі «Славян базары — 2017» жеңімпазы. 2017 жылы әлемнің 30 үздік дауысына кірді;
- Жеңіс Ысқақова – Қазақстанның эстрадалық әншісі, Қазақстан Республикасының еңбек сіңірген қайраткері. Мәскеу қаласындағы «Виват, Виктория» халықаралық конкурсының бас жүлдегері;
- Нодира Перматова (Өзбекстан) – Өзбекстан Республикасының еңбек сіңірген әртісі.
